|
Certi voti, cannu,
comu ora, mi fai raggiari,
ti vuria lassari.
Ti lassiria senza diri nenti, pigghiannu valigi
e bagattelli.
U sacciu chi quannu addiventu a sta manera
ti urtu, e ti siddii mi mi senti,
ma till'e ddiri, chi nta sti mumenti ti lassiria.
Lassiria i muntagni chi ciauriunu i boscu,
appuntiti e iauti.
Non vulissi avvidiri cchiù mancu a tò capitali,
Palemmu,
chi sò monumenti e i sò splenduri.
Non vuria nchianari cchiù tra sti pizzi aunni vidi
i nuvoli sutt'i tia,
chi u ventu puotta ora ccà ora ddà.
Certi voti, cannu vidu cosi stotti,
soprusi e sbagghi, ti vuria lassari o tò destinu.
E, cu rimpiantu, ripensiria a tutti i tò cosi beddi,
all'Arabi chi cannu vinniru ccà puttaru
cupoli e tradizioni.
Ripensiria 'e muntagni chini i nivi,
cannu u suli batti e vidi u cielu azzurru
e u mari 'nfunnu.
Pensiria cu nostalgia 'e ficarinni,
all'ulivi, 'e palmi, 'e coddi chini
i soni i l'aceddi chi cantunu.
Mi ricoddiria du sapuri di graniti o limuni a matina,
quannu u jornu cumincia e iapri l'occhi e u suli trasi
nte finestri, prepotenti comu sulu ccà sapi fari.
Pensiria o vulcanu ca nivi a Maggiu, ca cima ianca
i fari nvidia a tutti.
Mi ricoddiria da nivi supa o mari chi cadia raramenti, inaspettata, e inchia
barchi e spiaggi,
ca tuccavi e si squagghiava: e ni ripigghiava i l'amarizzi
da vita d'ogni ghiornu.
Pensiria a Mirtu, u paisittu chi tantu mi piaci, sospesu tra mari e munti,
tra cielu e tera, tra cosi riali e favuli, leggendi e miti.
Ma forsi mi piaci proprio picchì è u mei, stu paisi.
Nta sta terra ci su tanti cosi chi non vannu, e tu u sai bonu.
Ogni vota chi cecchi mi risovvi cacchi cosa, pari chi si
torna arreri.
Tu mi poi diri chi non aju bisognu mi vaju fora,
chi sugnu benestanti.
Chi mi manca? Aju l'amici, aju a famigghia,
aju u paesaggiu, chi mi manca?
Vuria un pocu d'ordini, vuria
cristiani chi non sbraitunu a mezzu 'a strada,
vuria chi tutti si renniriunu cuntu
i cantu si bedda, e fariunu casi ca facciata,
'nmodu ch'ogni continentali pò diri chi sì a megghiu.
Menu prepotenzi nta vita d'ogni ghiornu.
Ma fossi hai ragiuni tu: troppu sensibili sugnu.
Quanti to figghi ti lassaru?
Quanti maistri, muraturi, faligniami, scritturi,
musicanti annaru fora pi aviri riconoscimentu?
Yò non avria stu bisognu, ammenu cridu,
ma certi voti st'aria i rassegnazioni chi respiru
mi dugna fastidiu.
Minn'anniria tra i vii i Milanu,
unni-tu dici-a genti è fridda,
ma unni fossi c'è chiddu chi ceccu.
Minn'anniria tra vii traficati i genti chi parunu fummiculi,
frittulusi e spaisati.
Fossi, si mi nni vaju yò, non peddi nenti.
Fossi un ghiornu mi vidi dà, tra nigghia e ghiacciu,
a caminari ca fretta comu a tutti i continentali.
Na cosa ti promettu: puru nto mezzu i dda nigghia
vuria pinsari a tia.[/b]
|
